Plagosje me thikë në Pazarin e Vjetër të Korçës, përfshihen tre persona
Një sherr i ndodhur pak minuta më parë në zonën e Pazarit të Vjetër në Korçë ka përfunduar me një të plagosur me thikë dhe dy të tjerë të dëmtuar.
Sipas informacioneve paraprake, në konflikt janë përfshirë dy pronarë lokalesh dhe një person tjetër. Fillimisht përplasja ka nisur me debate verbale, por më pas ka degraduar në dhunë fizike, ku janë përdorur edhe karriget e lokalit.
Në një moment, njëri prej personave ka marrë një thikë dhe ka plagosur një nga të përfshirët. Të tre personat janë transportuar në spitalin e Korçës, ku po marrin ndihmë mjekësore. Njëri prej tyre ka marrë plagë nga thika, ndërsa dy të tjerët janë dëmtuar nga goditjet me karrige.
Ende nuk dihen shkaqet e konfliktit, ndërsa pritet që grupi hetimor të marrë deklaratat për zbardhjen e plotë të ngjarjes.
