Policia ka ndërmarrë veprime intensive hetimore për zbardhjen dhe dokumentimin e plotë ligjor të ngjarjes së ndodhur mbrëmjen e djeshme në zonën e Freskut, ku një 28-vjeçar mbeti i plagosur me armë zjarri.
Si rezultat i hetimeve, është identifikuar autori i dyshuar i plagosjes dhe dy bashkëpunëtorët e tij. Në vijim të procedurave:
Është shpallur në kërkim Klejvis Caka (i njohur edhe si Klejvis Lusha), 26 vjeç, banues në Tiranë, i dyshuar për veprat penale “Vrasje me dashje” e mbetur në tentativë dhe “Mbajtja pa leje dhe prodhimi i armëve, armëve shpërthyese dhe i municionit”;
Është arrestuar në flagrancë Xhonatan Qerimi, 27 vjeç, banues në Tiranë, për veprën penale “Përkrahje e autorit të krimit”;
Është shpallur në kërkim Andi Gurra, 26 vjeç, banues në Tiranë, për të njëjtën vepër penale “Përkrahje e autorit të krimit”.
Sipas hetimeve, Xhonatan Qerimi dhe Andi Gurra dyshohet se ndihmuan autorin e dyshuar, Klejvis Caka, të largohej nga vendngjarja pas kryerjes së krimit.
Policia vijon punën për kapjen e personave në kërkim dhe dokumentimin e mëtejshëm të kësaj ngjarjeje.
Njoftimi i Policisë:
Në vijim të veprimeve intensive hetimore për zbardhjen e plotë të ngjarjes së ndodhur mbrëmjen e djeshme, në rrugën “Thoma Filipeu”, në Fresk, ku mbeti i plagosur me armë zjarri 28-vjeçari J. A., specialistët e Sektorit për Hetimin e Krimeve të Rënda kundër Jetës dhe Pronës kanë identifikuar autorin e dyshuar dhe dy bashkëpunëtorët e tij.
Në vijim të veprimeve proceduriale:
U shpall në kërkim autori i dyshuar i plagosjes, shtetasi K. C. (L.), 26 vjeç, banues në Tiranë, për veprat penale “Vrasje me dashje” e mbetur në tentativë dhe “Mbajtja pa leje dhe prodhimi i armëve, armëve shpërthyese dhe i municionit”;
U arrestua në flagrancë shtetasi Xh. Q., 27 vjeç, banues në Tiranë, për veprën penale “Përkrahje e autorit të krimit”;
U shpall në kërkim shtetasi A. G., 26 vjeç, banues në Tiranë, për veprën penale “Përkrahje e autorit të krimit”.
Nga veprimet hetimore dyshohet se shtetasit Xh. Q. dhe A. G. kanë ndihmuar autorin e dyshuar të largohet nga vendngjarja.
Vijon puna për kapjen e shtetasve të shpallur në kërkim dhe dokumentimin e plotë ligjor të kësaj ngjarjeje.
Materialet procedurale i kaluan Prokurorisë, për veprime të mëtejshme.
