Një tjetër incident i rëndë është shënuar në burgjet greke, ku është plagosur rëndë një i burgosur shqiptar. Dhimitër Meci, 46 vjeç, nga Labova e Poshtme e Gjirokastrës, është sulmuar me një mjet prerës të improvizuar në burgun e Malandrinos.
Ngjarja ka ndodhur ditën e sotme, në momentin kur Meci po transferohej nga burgu i Koridhalos drejt Malandrinos. Autori i dyshuar është një i burgosur grek, E. Nousi, i akuzuar për organizatë kriminale, i cili punonte në mensën e burgut.
Meci ndodhej i paraburgosur që prej fillimit të dhjetorit 2025 dhe mbahej në repartin psikiatrik të burgut të Koridhalos. Ai ishte arrestuar nga policia greke në një operacion të gjerë, së bashku me shtetas shqiptarë dhe grekë, për tentativën e vrasjes së mafiozit grek Jani Lala në maj 2025. Ky i fundit u ekzekutua disa muaj më vonë nga një grup tjetër kriminal.
Gjatë kontrolleve të ushtruara në banesat e Mecit në Greqi dhe Shqipëri, autoritetet gjetën një arsenal armësh. Ai rezulton person me precedentë të shumtë penalë në Greqi, i dënuar më herët për vjedhje, grabitje, armëmbajtje pa leje, pjesëmarrje në organizata kriminale dhe vepra të rënda kundër jetës.
Autoritetet greke kanë nisur hetimet për rrethanat e sulmit, ndërsa gjendja shëndetësore e Mecit raportohet e rëndë.
