Një ngjarje e rëndë ka ndodhur mbrëmjen e së mërkurës në fshatin Ostren të Bulqizës, ku një 58-vjeçar ka plagosur me thikë djalin e tij 29-vjeçar.
Sipas njoftimit zyrtar të Policisë, rreth orës 23:00 të datës 29 janar 2026, shtetasi me inicialet B.N., pas një konflikti të çastit për motive të dobëta, dyshohet se ka goditur me mjet prerës (thikë) djalin e tij K.N., brenda banesës së tyre.
Menjëherë pas marrjes së njoftimit, shërbimet e Komisariatit të Policisë Bulqizë kanë shkuar në vendngjarje, ku falë reagimit të shpejtë kanë parandaluar përshkallëzimin e mëtejshëm të konfliktit. Autori i dyshuar është kapur dhe arrestuar në flagrancë, ndërsa mjeti prerës i përdorur në ngjarje është sekuestruar.
I riu i plagosur është transportuar në spital dhe ndodhet nën kujdesin e mjekëve, jashtë rrezikut për jetën.
Materialet procedurale i janë referuar Prokurorisë për veprime të mëtejshme ligjore.
