Pasi veshi çizmet, Ministri i Drejtësisë, Besfort Lamallari, i merakosur shkoi në terren për të parë nga afër situatën e krijuar nga përmbytjet në burgun e Durrësit.
Në pamjet e siguruara nga VNA, ministri inspektoi ambientet e burgut si dhe kërkoi stakimin e energjisë elektrike në katin e parë dhe evakuimi i të dënuarve në katet më sipër, përfshirë edhe të dënuarit e profilit të lartë. Paralelisht, në ndihmë të IEVP-së janë angazhuar pompa me kapacitet të lartë nga Ministria e Mbrojtjes për largimin e ujit.
Ndërkohë, në Durrës po funksionon Komisioni i Emergjencave Civile, i cili po koordinon veprimet për përballimin e situatës së krijuar nga moti i keq.
Drejtori i Përgjithshëm i Burgjeve, Klevis Qose, deklaroi se gjendja është nën kontroll dhe se po sigurohen furnizimet e nevojshme me mjete logjistike për të garantuar vijimin normal të aktivitetit dhe sigurinë e të dënuarve dhe stafit.
