Përmbytjeve në Durrës nuk i ka shpëtuar as burgu i qytetit, ku ndodhen të izoluar kryebashkiaku Erion Veliaj, ish-ministri i Shëndetësisë Ilir Beqaj dhe ish-deputeti i Partisë Socialiste, Jurgis Çyrbja.
Si pasojë e reshjeve të dendura të shiut, i gjithë kati i parë i institucionit të vuajtjes së dënimit është përmbytur, ndërsa të dënuarit dhe të paraburgosurit janë zhvendosur përkohësisht në katin e dytë të godinës. Gjithashtu, edhe rruga që të çon drejt burgut është përmbytur duke u kthyer në ‘lumë’.
Ndërkohë, mësohet se ministri i Drejtësisë, Besfort Lamallari, ka shkuar pranë IEVP-së së Durrësit për të monitoruar nga afër situatën.
Kujtojmë se i gjithë qyteti i Durrësit është paralizuar nga reshjet intensive të shiut dhe përmbytjet e rrugëve. Për shkak të situatës së krijuar, është pezulluar procesi mësimor në shkolla, ndërsa tetë familje janë evakuuar dhe janë strehuar në Kavalishencë, pasi uji ka depërtuar në banesat e tyre.
