Një 46-vjeçar nga Tirana, Altin Celami, është arrestuar pas një operacioni të koduar “Gun Expert”, gjatë të cilit policia sekuestroi 4 pistoleta me municion luftarak, lëndë narkotike kokainë dhe pjesë të ndryshme armësh. Celami, i cili përdorte taksinë e tij për të shmangur kontrollet, dyshohet se furnizonte grupe kriminale me armë zjarri.
Policia bën me dije se Celami ishte i implikuar edhe më parë në aktivitete të ngjashme, dhe në vitin 2022 ishte arrestuar si person i dyshuar për furnizim të grupeve kriminale, duke u pezulluar edhe nga funksionet ushtarake në repartin e Pezë Helmez.
Operacioni, i zhvilluar nga Komisariati i Policisë Nr. 4 në bashkëpunim me Seksionin e Trafiqeve të DVP Tiranë dhe nën drejtimin e Prokurorisë së Tiranës, çoi në arrestimin e Celamit në Rrugën e Dibrës teksa drejtonte automjetin tip taksi.
Gjatë kontrollit të automjetit dhe banesës u sekuestruan armët, municioni, droga dhe pjesët e armëve, të cilat do të përdoren si prova materiale. Policia njofton se vijon puna për identifikimin e personave të tjerë të përfshirë në këtë aktivitet kriminal.
