Dhjetë ditë pas ngjarjes së rëndë në Gjykatën e Apelit, ku gjyqtari Astrit Kalaja u vra brenda sallës së gjyqit, janë forcuar ndjeshëm masat e sigurisë në hyrje të institucionit.
Tashmë, prezenca e forcave të policisë është shtuar si brenda ambienteve të gjykatës, ashtu edhe jashtë saj. Kontrollet e sigurisë janë bërë më të rrepta, duke përfshirë jo vetëm skanimin me pajisje detektoruese, por edhe kontroll fizik të kryer nga punonjësit e sigurisë dhe efektivët e policisë.
Ndryshime janë bërë edhe në mënyrën e pritjes së qytetarëve. Ndryshe nga më parë, kur publiku qëndronte në paradhomën para skanerit, tashmë pritja bëhet jashtë ndërtesës, ku janë vendosur tabela të reja informuese me mbishkrimin "Pritja për publikun". Qytetarët thirren një nga një për të hyrë, dhe u nënshtrohen një kontrolli të detajuar përpara se të lejohen të kalojnë në ambientet e brendshme.
Këto masa të shtuara synojnë të garantojnë sigurinë e stafit gjyqësor dhe të publikut, pas incidentit tronditës që tronditi sistemin e drejtësisë në vend.
