Një 20-vjeçare shqiptare është kthyer më në fund në atdhe pas më shumë se një dekade në kampet e Sirisë, duke i dhënë fund një historie të gjatë vuajtjeje për familjen e saj.
Eva Dumani u largua nga Shqipëria kur ishte vetëm 9 vjeç, pasi u mor nga babai i saj dhe u dërgua në Siri së bashku me vëllain e vogël.
Ai u vra më pas gjatë luftës me Shtetin Islamik, ndërsa fëmijët mbetën për vite të tëra në kampe në kushte shumë të vështira.
Pas arratisjes nga kampi al-Hawl në fillim të këtij viti, e reja arriti të kalojë në Turqi me ndihmën e kontrabandistëve dhe më pas u kthye në Shqipëri.
Ajo kishte ecur për orë të tëra për të dalë nga kampi dhe për të arritur në një rrugë kryesore.
Ribashkimi me familjen ishte momenti më i shumëpritur. Pas 12 vitesh, ajo takoi sërish nënën dhe vëllain. Tani, 20-vjeçarja ka nisur të rindërtojë jetën e saj, duke u kthyer në shkollë për të vazhduar arsimin e ndërprerë.
Historia e saj vjen në një kohë kur situata në kampet në veri të Sirisë mbetet e paqartë. Mijëra gra dhe fëmijë nga vende të ndryshme, përfshirë edhe Shqipërinë, vijojnë të qëndrojnë atje në kushte të rënda dhe pa një zgjidhje të qartë për të ardhmen.
Shqetësimi mbetet për dhjetëra shqiptarë që janë ende të bllokuar në këto kampe. Familjarët kërkojnë që ata të kthehen sa më parë në vend, për t’u ribashkuar me të afërmit dhe për të nisur një jetë të re.
