Gjykata e Posaçme e Apelit për Korrupsionin dhe Krimin e Organizuar (GJKKO) ka shpallur vendimin për çështjen penale lidhur me skemën e mashtrimit me “Call Center”-a të zbuluar së fundmi. Sipas njoftimit zyrtar, gjyqtarja Iliriana Olldashi vendosi lënien në fuqi të vendimit të shkallës së parë për të hetuarit K.K dhe H.Xh, duke ruajtur ndaj tyre masën e sigurimit personal “arrest në burg”.
Ndërkohë, gjykata miratoi vendimin edhe për të hetuarit E.M, E.Gj, R.Gj dhe D.Q sa i takon vlerësimit si të ligjshëm të arrestimit në flagrancë të kryer më 17 janar 2026.
Për këta katër të fundit, Apeli ndryshoi masën e sigurisë nga “arrest në burg” në “arrest në shtëpi”, duke urdhëruar që të mos largohen nga banesa e deklaruar. Gjykata vendosi gjithashtu lirimin e menjëhershëm të tyre nga paraburgimi, nëse nuk mbahen për ndonjë shkak tjetër ligjor.
