Një grup kriminal në Bullgari, i dyshuar për vjedhjen e mijëra artefakteve nëpër Europë dhe trafikimin e tyre drejt vendeve të ndryshme, është goditur në një operacion të gjerë ndërkombëtar. Autoritetet e gjashtë vendeve, në bashkëpunim me Eurojust dhe Europol, arrestuan 35 anëtarë të grupit dhe kontrolluan mbi 125 ambiente, duke sekuestruar më shumë se 3 000 artefakte me vlerë mbi 100 milionë euro. Vlera totale e sendeve të vjedhura vlerësohet rreth 870 milionë euro.
Hetimet nisën pas një bastisjeje në një shtëpi në Bullgari në vitin 2020, ku u sekuestruan 7 000 objekte me rëndësi të madhe historike, përfshirë maska, pajisje ushtarake, bizhuteri dhe objekte nga civilizimet trakase dhe greko-romake, disa prej tyre të datuara deri në vitin 2000 p.K. Dyshimet për origjinë të paligjshme të artefakteve çuan në hapjen e një hetimi të thelluar.
Ndër të arrestuarit është një person i konsideruar “High-Value Target”, i dyshuar si drejtues i rrjetit të trafikut dhe financues i gërmimeve të paligjshme në Bullgari dhe vendet fqinje. Grupi dyshohet se përdorte dokumente të dyshimta nga shtëpi ankandesh dhe galeri arti në Francë, Gjermani, Britaninë e Madhe dhe SHBA për të legalizuar artefaktet.
Operacioni ndërkufitar u koordinua më 19 nëntor nga Eurojust në Hagë, ku në Bullgari u arrestuan 35 persona dhe u kontrolluan 120 lokacione. Bastisje u kryen gjithashtu në Francë, Gjermani, Greqi dhe Shqipëri. Autoritetet sekuestruan mbi 3 000 artefakte, monedha ari dhe argjendi, vepra arti, pajisje elektronike, dokumente, mbi 50 000 euro para cash dhe ar investimi.
Eurojust lehtësoi zbatimin e pesë urdhrave europianë të hetimit dhe dy kërkesave për asistencë juridike, ndërsa Europol krijoi një task-forcë operacionale dhe dërgoi dy ekspertë në Sofje për koordinim dhe mbështetje analitike. Hetimet për grupin kriminal dhe artefaktet e trafikuara do të vazhdojnë.
Në operacion morën pjesë autoritetet e Bullgarisë, Francës, Gjermanisë, Greqisë, Italisë dhe Shqipërisë (SPAK).
