Një operacion antidrogë është zhvilluar gjatë orëve të natës në qytetin e Lezhës, ku Policia ka zbuluar një magazinë të përshtatur për kultivimin e kanabisit me ndriçim artificial.
Sipas burimeve zyrtare, magazina ndodhej pranë superstradës Lezhë–Laç, në afërsi të kryqëzimit të Spitenit. Gjatë kontrollit në ambientet e saj, shërbimet e Policisë kanë gjetur qindra rrënjë kanabisi, si dhe pajisje të specializuara për kultivim, përfshirë llamba ndriçimi, sisteme ajrosjeje dhe elementë të tjerë teknikë.
Po ashtu, gjatë operacionit janë sekuestruar armë zjarri dhe municion, të cilat dyshohet se përdoreshin për ruajtjen e aktivitetit kriminal.
Në kuadër të këtij operacioni janë arrestuar dy persona, të dyshuar si të përfshirë drejtpërdrejt në këtë veprimtari të paligjshme, ndërsa pesë persona të tjerë janë shpallur në kërkim.
Policia bën me dije se hetimet vijojnë për dokumentimin e plotë të ngjarjes, identifikimin dhe kapjen e personave të tjerë të përfshirë, si dhe për zbardhjen e plotë të rrjetit kriminal.
