Një 32-vjeçar me shtetësi suedeze, i cili po qëndronte përkohësisht në Dibër, është sulmuar të enjten në mbrëmje në qytetin e Manastirit, Maqedoni e Veriut.
Ngjarja ndodhi në rrugën kryesore të qytetit, “Rruga e Gjerë”, ku disa të rinj rreth moshës 20 vjeç iu afruan dhe tentuan t’i heqin me forcë bluzën që kishte veshur 32-vjeçari. Sipas denoncimit të bërë në polici, bluza mbante simbole të Shqipërisë, dhe dyshohet se kjo ka qenë arsyeja e sulmit. Kur kuptoi se nuk mund të mbrohej, suedezi vendosi t’ua dorëzojë vetë bluzën personave të panjohur, të cilët më pas u larguan nga vendngjarja.
Ministria e Punëve të Brendshme e Maqedonisë së Veriut konfirmoi incidentin përmes një njoftimi zyrtar, duke saktësuar:
“Të enjten, rreth orës 19:50, në SPB Manastir, S.H.D. (32) nga Suedia, me qëndrim të përkohshëm në Dibër, raportoi se persona të panjohur i janë afruar dhe kanë tentuar t’i heqin bluzën me simbole të një shteti tjetër.”
Policia ka nisur hetimet dhe po punon për identifikimin e autorëve të sulmit. “Po bëhen verifikime për ngjarjen dhe po merren masa për identifikimin e autorëve,” theksohet në njoftimin zyrtar të institucionit.
