Rreperi Rigels Rajku, i njohur si Noizy, babai i tij Bashkim Rajku dhe e motra u paraqitën në Gjykatën e Posacme për të dëshmuar në procesin ndaj të akuzuarve si anëtarë të bandës së Laert Haxhiut.
Për shkak të mungesës së avokatëve të disa prej të pandehurve procesi u shty për këtë arsye të tre duhet të paraqiten për të dëshmuar në seancën e radhës. Gjatë momentit kur gjyqtari iu bëri me dije datën e re, babai i Noizyt e pyeti atë nëse mund të paraqitej vetëm ai apo duhet të vinin të tre pjesëtarët e familjes. Gjykata tha se që të tre janë dëshmitarë dhe për rrjedhojë duhet të paraqiten.
Noizy dhe pjesëtarët e tjerë të familjes do të dëshmojnë lidhur me shkatërrimin e biznesit të tyre me tritol. Në qershor të 2022 rreth 100 gr tritol shpërtheu në biznesin e rreperit. Lënda plasëse ishte vendosur në murin e jashtëm të biznesit dhe ishte ndezur me fitil përcjellës. Ngjarja u zbardh pas rrëfimit të të penduarit të drejtësisë, Artan Tafani i cili deklaroi se tritoli ishte vendosur me urdhër të Laert Haxhiut. Kjo si kundërpergjigje për dhunimin e shokut të tij, Kleviol Ahmeti i njohur si CLLEVIO , nga Noizy dhe disa prej miqve të tij.
Banda e drejtuar nga Laert Haxhiu po gjykohet për krime të rënda, si vrasje, grabitje, shkatërrim prone me eksploziv.
