Polici Novruz Cenalia do të nderohet sot me titullin “Dëshmor i Atdheut”, një vlerësim i lartë për sakrificën e tij në krye të detyrës, dy vite pas ngjarjes tragjike që tronditi opinionin publik në vend.
Cenalia u vra mesditën e 13 majit 2024 gjatë ushtrimit të detyrës, pasi ndaloi një automjet dhe i kërkoi drejtuesit të mos lëvizte me shpejtësi në rrugë. Autori i krimit, Azgan Mërnica, reagoi me armë zjarri duke e qëlluar për vdekje efektivin e policisë, duke shkaktuar një ngjarje të rëndë që solli reagime të forta nga institucionet dhe qytetarët.
Ngjarja u konsiderua një sulm i rëndë ndaj uniformës së shtetit dhe rendit publik, ndërsa vrasja e efektivit shkaktoi debat të gjerë mbi sigurinë e punonjësve të policisë gjatë ushtrimit të detyrës.
