Plagosja e një minatori në minierën e bakrit në Spaç të Mirditës ka risjellë në vëmendje problemet me kushtet e sigurisë në minierë për të cilat minatorët protestuan një vit më parë.
Një 48-vjeçar ka mbetur i plagosur gjatë natës në minierën e bakrit në Spaç të Mirditës pas shkëputjes së një masivi shkëmbor, në një aksident që ka rikthyer në vëmendje kushtet e vështira të punës në galeritë e menaxhuara nga kompania turke “Tete Albania”.
Aksidenti në punë ndodhi ndërsa minatori Edmond Gjikolaj, banues në Rrëshen, ishte duke punuar në nëntokë së bashku me kolegë të tjerë për nxjerrjen e mineralit të bakrit. Sipas të dhënave paraprake, shkëputja e papritur e shkëmbit e ka zënë poshtë 48-vjeçarin, duke i shkaktuar dëmtime të shumta trupore.
Gjikolaj u transportua me urgjencë drejt Spitalit të Traumës në Tiranë. Burime spitalore bënë me dije se aktualisht ai ndodhet nën kujdesin e mjekëve dhe raportohet jashtë rrezikut për jetën.
Menjëherë pas ngjarjes, Policia lokale, e drejtuar nga Prokuroria dhe Inspektoriati Shtetëror i Punës, kanë nisur një hetim të përbashkët. Autoritetet po verifikojnë kushtet e sigurisë dhe zbatimin e rregullave të sigurimit teknik brenda galerisë ku u regjistrua aksidenti.
Ngjarja pason një seri ankesash nga punëtorët e kësaj miniere. Gjatë vitit të kaluar, minatorët e Spaçit mbajtën greva dhe protestuan për më shumë se dy muaj radhazi, duke denoncuar publikisht kushtet tejet të vështira të punës në nëntokë dhe pagat e ulëta të ofruara nga “Tete Albania Tunnel & Mining” sh.a., kompania që shfrytëzon vendburimin përmes një kontrate koncesionare.
Pas incidentit të fundit ka reaguar edhe Konfederata e Sindikatave të Shqipërisë (KSSH). Përmes një deklarate publike, KSSH shprehu solidaritet me minatorin e plagosur dhe familjen e tij, ndërsa theksoi se ky aksident nuk është një rast i izoluar.
Sipas sindikatës, ngjarja është pasojë e drejtpërdrejtë e problemeve të vazhdueshme me sigurinë në punë në këtë minierë. KSSH akuzoi kompaninë “Tete Albania Tunnel & Mining” sh.a. për shkelje të rregullave të sigurisë dhe mbrojtjes së shëndetit në punë, duke kërkuar një hetim të plotë dhe transparent, si dhe vënien para përgjegjësisë të institucioneve mbikëqyrëse dhe vetë kompanisë./BIRN/
