Një i mitur është përfshirë mes 23 personave të shoqëruar nga Policia e Shtetit pas dhunës së regjistruar gjatë protestës së sotme të thirrur nga Partia Demokratike para Kryeministrisë dhe Kuvendit.
Sipas njoftimit zyrtar, gjatë tubimit janë shënuar sulme me molotov, lëndë piroteknike dhe sende të forta ndaj forcave të rendit, si pasojë e të cilave 11 punonjës policie janë lënduar dhe kanë marrë ndihmë mjekësore në Spitalin e Traumës dhe repartin e djegies. Ata janë vizituar nga drejtues të Policisë Vendore të Tiranës.
Policia thotë se, pavarësisht thirrjeve të vazhdueshme për ndalimin e dhunës, aktet agresive kanë vijuar, duke e detyruar të ndërhyjë për shpërndarjen e turmës në përputhje me ligjin.
Në kuadër të hetimeve, grupi hetimor nën drejtimin e Prokurorisë së Tiranës ka nisur dokumentimin e veprimeve të dhunshme, ndërsa shërbimet policore po analizojnë pamjet filmike për identifikimin e personave të përfshirë.
Gjatë verifikimeve të moshës së të shoqëruarve, një prej tyre ka rezultuar i mitur. Policia bën me dije se prindërit janë njoftuar menjëherë dhe se i mituri nuk është mbajtur në ambientet e shoqërimit, por ka qëndruar në zyrën e pritjes së qytetarëve deri në momentin kur është marrë në dorëzim nga familjarët.
Rasti i përfshirjes së një të mituri në episodet e dhunës gjatë protestës ka ngritur pikëpyetje mbi sigurinë e fëmijëve në tubime politike dhe përgjegjësinë e organizatorëve për praninë e tyre në situata me rrezik.
