Në procesin ndaj anëtarëve të bandës kriminale të Laert Haxhiut, kundërshtarit të përbetuar të Aldo Bares, janë duke u dëgjuar rrëfimet e dëshmitarëve. Para trupës gjykuese është duke folur dëshmitari okular i atentatit ndaj Kujtim Metës, ngjarje e ndodhur në prill 2022.
“Kujtim Metën e njoh. E kam në lagjen. Ditën që ndodhi atentati ndaj Kujtimit isha me vëllanë duke pirë kafe, kur hyri dikush me maskë. U fsheha poshtë tavolinës. E morëm me makinën time e çuam në spital. Lokali ndodhet te stacioni i trenit në Lushnjë. Kujtimi ishte dy tavolina larg meje. Unë kam qenë në hyrje të lokalit në krah të djathtë, ai ishte në tavolinën përballë derës. Kam dëgjuar vetëm “pau pau” jam shtrirë poshtë tavolinës. Autori ishte i maskuar, nuk e mbaj mend fiks sa afër i shkoi objektivit. Vëllai kaloi në traumë pas ngjarjes. U largova deri te shkolla, në momentin kur jam kthyer, e kemi marrë dhe çuar në spital. E çuam në spital bashkë me pronarin e lokalit. Kujtimi punonte si shofer transporti”, tha dëshmitari.
Në të njëjtën seancë, pritet të dëshmojë Bashkim Rajku, babai i Rigels Rajkut, reperit të njohur si Noizy si dhe motra e këtij të fundit. Banda e Laert Haxhiut i shkatërroi me eksploziv biznesin familjes Rajku.
