Ka mbërritur në Gjykatën e Fierit Xhension Toromeni, 25 vjeç, i akuzuar për vrasjen e fqinjit të tij, Besmir Kumria, 32 vjeç, ngjarje e ndodhur dy ditë më parë në fshatin Kryekuq të Divjakës.
Seanca për vlerësimin e arrestit dhe caktimin e masës së sigurisë ndaj të riut drejtohet nga gjyqtarja Aurora Tushe, ndërsa organi i akuzës përfaqësohet nga prokurori Kristi Jorgji.
Prokuroria i ka ngritur Toromenit akuzat e rënda për “vrasje me paramendim” dhe “mbajtje pa leje të armëve të ftohta”, pasi dyshohet se ai goditi me thikë fqinjit të tij duke i shkaktuar vdekjen të menjëhershme.
Ngjarja ndodhi në një lokal të fshatit Kryekuq, ku dy fqinjët u përballën pas një konflikti të hershëm. Hetimet tregojnë se sherri kishte fillesat rreth dy vite më parë, gjatë një zënke për ujin e kanalit vaditës, ku Kumria kishte qëlluar me shuplakë babain e Toromenit. Pikërisht ky konflikt i mbartur dyshohet se çoi në përplasjen fatale.
Pas krimit, autori u largua nga vendngjarja, por u kap pak orë më vonë në arrati nga policia. Gjatë arrestimit, Toromeni mësohet t’u ketë thënë efektivëve se krimi ishte një akt hakmarrjeje për fyerjen dhe dhunën e mëparshme ndaj babait të tij.
