Janë zbuluar detaje të reja për Artur Tushin, shqiptarin që u ekzekutua nga një vrasës me pagesë pranë banesës së tij në Medellin, Kolumbi. 44-vjeçarit i janë qëlluar plot 11 plumba, që i morën jetën në vend, ndërsa autori i krimit, një 35-vjeçar venezuelian, u arrestua 19 kilometra larg vendit të ngjarjes.
Policia kolumbiane njoftoi se vrasësi i Tushit ishte paguar në dollarë, çka ngre dyshime se krimi mund të jetë i lidhur me përplasje kriminale ndërkombëtare në qytet.
Artur Tushi, i njohur në Shqipëri me nofkën “Qoti”, ishte me origjinë nga fshati Raboshtë në Lezhë. Në vitin 2017, gjatë kohës që jetonte dhe punonte në Itali, ai u rrëmbye në zonën mes Fushë-Milotit dhe fshatrave pranë rrugës kombëtare Milot–Burrel, teksa po udhëtonte me makinën e tij, e cila më pas u braktis në vendin e ngjarjes.
Sipas Policisë Shqiptare, disa persona ndaluan automjetin e Tushit, i vendosën një qese në kokë dhe e morën peng në një banesë. Gjatë rrëmbimit, shqiptarit i vodhën 200,000 lekë. Hetimet zbuluan se Tushi nuk kishte precedent penal as në Shqipëri dhe as në Itali.
Megjithatë, dyshohet që ky incident të ketë qenë i lidhur me aktivitete të paligjshme në të cilat ai ishte përfshirë jashtë vendit.
Pas hetimeve të para nga autoritetet kolumbiane përmes Interpol-it, u zbuluan disa precedentë penalë në emrin e Tushit në vende të ndryshme, përfshirë Ekuadorin dhe Spanjën, që ishin duke e hetuar. Ndër këto precedentë përmenden vepra si dhunë fizike dhe posedim droge.
Vrasja e Tushit ka tronditur opinionin publik dhe ka rikthyer vëmendjen te rrjetet ndërkombëtare të trafikut të drogës në Amerikën Latine. Dyshohet se ai mund të ketë qenë një narkotrafikant me lidhje në Europë.
