IMT është akronimi për Inspektoriatin e Mbrojtjes së Territorit. Thënë ndryshe, është zyra që zbaton një nga aksionet e radhës së qeverisë – atë të heqjes së tendave e karrigeve të lokaleve në Tiranë e gjetkë. SPAK arrestoi inspektorët e IMT Gerald Fuçia dhe Edmond Çela, pasi dyshohen se kanë marrë para nga një biznes për tendat. Në pranga përfundoi edhe Niko Zmalaj, punonjës në Bashkinë Tiranë, Drejtoria e Rrugëve (DPN 2). Ndërkohë, në kërkim u shpall Klajdi Zhilla, inspektor që shërbente edhe si shofer i drejtorit të drejtorisë sw Terrenit nw IMT, Ersid Hasanllari.
Në pamje të parë, duket si një aksion rutinë për të tilla inspektoriate, që prej kohësh njihen si vatra korrupsioni. Nuk ka shqiptar që se ka provuar të paktën njëherë në kurriz. Inspektorët shëtisin biznes më biznes, vendosin gjoba dhe mbledhin rryshfete. Profili tipik? Një djalë në të tridhjetat, i veshur me rroba të shtrenjta, me çantë lëkure nën sqetull dhe me bark që po rrumbullakoset njësoj si xhepi.
Ndonjëherë ndodh që disa prej tyre përfundojnë në burg – si dy të arrestuarit dje. Por shumica e arrijnë “të majmen” pa u trazuar. Më qesharakja është gjithmonë mënyra se si shfaqet reagimi publik pas një skandali: drejtues që dalin të distancuar nga “aktet individuale” të vartësve. Njësoj ndodhi dje me drejtuesin e drejtorisw sw Terrenit nw IMT-nw e Tiranws, Ersid Hasanllari të cilit i mungon një CV dhe një foto edhe në faqen zyrtare të institucionit.
Ama deklarata për distancim nuk mungoi. Në frymën e propagandës së shefit të madh, edhe Hasanllari bëri të qartë se përgjegjësia është vetëm personale. Dhe nuk kanë faj, nëse mendon si ka shpëtuar vetë Erion Veliaj pas gjithë “aksioneve” e aferave të tij.
