Tragjedia e Xhuana Nikolli vijon të tronditë opinionin publik, ndërsa motra e saj ka rrëfyer detaje të rënda mbi dhunën që, sipas familjes, e reja përjetoi nga ish-bashkëshorti Eraldo Fizi, i cili vijon të jetë në arrati.
Në një intervistë për emisionin “Në Shënjestër” të gazetares Klodiana Lala në News24, motra e Xhuanës e përshkroi 25-vjeçaren si “një yll që lindi në dashuri, por u fik në dhunë”.
Xhuana i dha fund jetës më 10 mars 2026 në Tiranë, pasi konsumoi fotoksinë në apartamentin me qira ku jetonte. Sipas familjarëve, ajo kishte përjetuar dhunë fizike dhe psikologjike, ndërsa ekspertiza mjeko-ligjore konstatoi shenja dhune në trupin dhe fytyrën e saj. Familjarët ngrenë ende pikëpyetje mbi rrethanat e ngjarjes, duke kërkuar zbardhjen e plotë të asaj që ndodhi natën e 9 marsit. Një nga misteret kryesore mbetet mënyra se si Xhuana siguroi fotoksinën dhe nëse ajo e konsumoi vetë apo u detyrua.
Sipas motrës së saj, Xhuana dhe Eraldo njiheshin prej vitesh dhe ishin lidhur që në bankat e gjimnazit. Ata u martuan më 9 qershor 2025, por martesa zgjati vetëm tre muaj. Pas problemeve dhe konflikteve të vazhdueshme, Xhuana u largua nga banesa bashkëshortore në Lezhë dhe u zhvendos fillimisht te motra e saj në Tiranë, për të jetuar më pas në një apartament me qira bashkë me një shoqe.
Motra e saj thotë se Xhuana nuk ishte rritur në një familje ku ekzistonte dhuna dhe se ajo nuk e meritonte atë që përjetoi.
“Xhuana ishte vajzë e qeshur, zemërgjerë dhe me shumë dashuri për ish-bashkëshortin. Por ajo dashuri nuk iu kthye kurrë”, u shpreh ajo.
Familja kërkon arrestimin sa më të shpejtë të Eraldo Fizit dhe vendosjen e tij përballë drejtësisë për akuzat “Dhunë në familje” dhe “Shkaktim i vetëvrasjes”.
Në fund të rrëfimit të saj, motra e Xhuanës pati edhe një mesazh të drejtpërdrejtë për Eraldo Fizin:
"Kudo që të fshihesh, një ditë do të dalësh dhe do të paguash për atë dhunë fizike. Xhuana meritonte të jetonte dhe të ishte e lumtur.”
