Në zonat pyjore të dëmtuara nga zjarret pranë Rrugës së Arbrit kanë filluar të shfaqen tabela me mbishkrimin “Pronë private”, pavarësisht se nuk dihet kush i ka vendosur dhe mbi çfarë baze ligjore mbështeten këto pretendime. Situata ka ngritur shqetësime serioze, sidomos për faktin se nuk është bërë transparente origjina e pronësisë.
Banorë të zonës, në mënyrë jozyrtare, kanë pohuar se prej kohësh ka pasur zëra për ndërtimin e impianteve fotovoltaike në këto sipërfaqe, gjë që ushqen dyshimet se zjarret mund të jenë përdorur qëllimisht për të ndryshuar destinacionin e tokës dhe për të hapur rrugë investimeve të dyshimta.
Rruga e Arbrit, një aks kyç që lidh Dibrën me kryeqytetin, është një zonë me rëndësi strategjike dhe duhet të jetë nën vëzhgim të vazhdueshëm nga institucionet shtetërore. Megjithatë, deri më tani nuk është marrë asnjë masë për të hetuar arsyet e vërteta të zjarreve apo për të penguar vendosjen e tabelave që sinjalizojnë pronësinë private.
Fakti që këto tabela janë vendosur vetëm pak javë pas djegieve masive shton dyshimet për një përpjekje të organizuar për përfitime të paligjshme. Autoritetet përkatëse duhet të ndërhyjnë menjëherë për të verifikuar ligjshmërinë e çdo pretendimi mbi këtë territor dhe për të garantuar mbrojtjen e interesit publik. Mosreagimi institucional vetëm sa forcon dyshimet për tolerim apo bashkëpunim të heshtur me individë që synojnë përfitime në kurriz të mjedisit.
