Të jesh në kërkim nga drejtësia për korrupsion dhe të përfitosh fonde publike prej saj. Ky është rasti i biznesmenit, Ermal Beqiri, i cili ndonëse është nën hetim për abuzime me tenderat e AKSHI dhe është akuzuar për grup të strukturuar kriminal, Këshilli i Lartë Gjyqësor i ka dhënë tenderin pej 3.3 miliardë lekësh kompanisë së tij.
Bëhet fjalë për procedurën “sistem ENTERPRICE SERVICE BUS (ESB)”, ose e thënë me fjalë të thjeshta, një sistem që lidh të gjitha programet kompjuterike të një institucioni, në mënyrë që ato të komunikojnë me njëra-tjetrën automatikisht.
Por çudia nuk qëndron vetëm tek fakti që prokurimin e fiton kompania “Soft Solution dhe Horizon”, kompani nën hetim të të shpallurit në kërkim, Ermal Beqiri, por edhe tek konkurreti tjetër në garë.
Në këtë tender kanë marrë pjesë gjithsej tre operatorë, dhe ajo që bie në sy është që një nga subjektet ndonëse ka shprehur interes për procedurën në fjalë, nuk ka paraqitur ofertë. Kjo është një teknikë e vjetër e tenderave të paracaktuar, ku kompani fiktive futen vetëm sa për të dhënë idenë e garës, duke i lënë rrugën e lirë fituesit në fund.
Për ironi, konkurrent në tender ka qenë edhe kompania “Advanced Business Solutions – ABS”, e biznesmenit Gerond Meçe, i cili doli në hetimet e SPAK se ishte marrë peng nga Ermal Beqiri dhe Ergys Agasi.
Në këtë procedurë kompania e Meçes garonte si bashkim operatorësh me kompaninë “Data Log”. Duket se edhe këtu ka pasur një “përplasje” mes Beqirit dhe Meçes, pasi ky i fundit ka paraqitur dhe një ankesë në Komisionin e Prokurimeve Publike, ose siç njihet si “apeli” i tenderëve, por që ky i fundit e ka rrëzuar.
Kujtojmë se hetimet e SPAK tregojnë se Ermal Beqiri, pronar i shoqërisë “Soft & Solution”, ka fituar dhjetëra tendera publikë pranë AKSHI-t, ndërsa Ergys Agasi ka vepruar si hallkë lidhëse mes biznesit dhe zyrtarëve të institucionit, duke siguruar favorizimin e kompanive të caktuara dhe eliminimin e konkurrencës.
Një nga provat kryesore të hetimit është episodi i dyshuar i pengmarrjes dhe dhunimit të biznesmenit Gerond Meçe, i cili kishte nisur ankesa për procedurat e tenderimit të AKSHI-t. Sipas SPAK, Meçe është marrë peng për disa orë nga Agasi dhe Beqiri, në bashkëpunim me zyrtarë të Policisë së Shtetit, dhe është detyruar të tërhiqet nga garat publike.
Megjithatë, paradoksi më i madh qëndron në faktin se si KLGJ, një institucion që duhet të garantojë integritetin e gjyqtarëve dhe një nga institucionet më të larta të drejtësisë, kalon paratë e buxhetit të saj në xhepat e një personi që i fshihet drejtësisë.
