Policia e Tiranës ka finalizuar operacionin policor të koduar “Wrong Project”, me qëllim goditjen e rasteve të ndërtimeve të paligjshme në zonën rezidenciale të Saukut.
Sipas njoftimit zyrtar, pesë inspektorë të IMT Tiranë janë arrestuar, ndërsa një tjetër është nën hetim, pasi dyshohet se kanë shpërdoruar detyrën, duke lejuar ndërtimin pa leje të tre objekteve në këtë zonë.
Gjithashtu, dy shtetas janë vënë në pranga dhe tre të tjerë janë shpallur në kërkim, të gjithë me rolin e administratorëve të subjekteve ndërtuese dhe zbatues të projektit.
Operacioni është zhvilluar në kuadër të planit mbarëkombëtar “Hapësira Publike”, që synon evidentimin dhe ndëshkimin e ndërtimeve të paligjshme dhe pushtimeve të hapësirave publike për qëllime fitimprurëse.
Hetimet vijojnë për identifikimin e personave të tjerë të përfshirë në këtë aktivitet të paligjshëm.
