Policia e Sarandës ka dhënë informacionin zyrtar lidhur me humbjen e jetës së gazetarit të njohur Artur Zheji, i cili ndërroi jetë pasditen e sotme në qytetin bregdetar.
Sipas njoftimit paraprak të Policisë, rreth orës 16:10, në afërsi të rrugës “Butrinti”, shtetasi A. Zh., 63 vjeç, banues në Tiranë, dyshohet se ka shfaqur probleme shëndetësore gjatë qëndrimit në një restorant. Gjatë transportimit me autoambulancë drejt spitalit, ai ka ndërruar jetë.
Grupi hetimor ndodhet në vendngjarje dhe po vijon punën për sqarimin e plotë të rrethanave të këtij rasti.
Artur Zheji ka qenë një nga figurat më të njohura të gazetarisë dhe analizës politike në vend, me një karrierë të gjatë në media, si drejtues, opinionist dhe autor.
