Naftëtarët dhe punonjësit e kompanisë “Bankers Petroleum” hyjnë në grevë urie dhe paralajmërojnë bojkot të punës në terren në ditët në vijim.
Mëngjesin e së mërkurës, rreth 200 punonjës protestuan para zyrave të kompanisë, duke kërkuar përmirësim të kushteve të punës dhe rishikim të pagave.
Dhjetë naftëtarët e parë kanë nisur grevën e urisë, ndërsa nga e enjtja pritet që t’u bashkohen edhe punonjës të tjerë. Ata thonë se kompania “Bankers Petroleum” nuk i ka marrë në konsideratë kërkesat e tyre të vazhdueshme për përmirësimin e kushteve të punës. Ndërkohë, sipas tyre, pagat nuk janë rritur prej më shumë se një dekade.
