Mustafa Martinaj, babai i Ervis Martinaj mbretit të kumarit të zhdukur pa gjurmë që nga 2022, është paraqitur në GJKKO ku do të shqyrtohet çështja e sekuestrimit të pasurive.
“Fatin e djalit tim e dinë të gjithë, përveç medias dhe Prokurorisë. Djali im është ekzekutuar në Durrës, si nga e di?! Jam babai pra! Dhe për këtë çështje kam dhënë shpjegime para agjentëve të Byrosë Kombëtare të Hetimit, ku jam paraqitur me iniciativën time, kam ardhur vetë. Këta nuk duan ta hetojnë dhe ia kanë lënë Kurbinit,” tha Mustafa Martinaj. Ai tha se nuk ka se për çfarë të interesohet në prokurorinë e Kurbinit për hetimet pasi nuk ka askush vullnet ta hetojë. “Nuk kam fuqi as për hakmarrje. Këta merren me vogëlsira dhe nuk merren me gjëra madhore”, tha më tej ai.
