Një tjetër tragjedi rrugore ka tronditur vendin. Në Vlorë, pas mesnate, një 17-vjeçar që po kthehej nga puna si kamarier u përplas për vdekje nga një makinë tip “Porsche”. Drejtuesi i mjetit ishte i dehur dhe lëvizte me shpejtësi skëterrë në zonë urbane. Një jetë e re u shua në vend, ndërsa autori, si shumë të tjerë para tij, pritet t’i shpëtojë lehtësisht pasojave me ndonjë gjobë apo me disa muaj burg.
Ky nuk është një rast i izoluar. Prej vitesh rrugët shqiptare janë kthyer në terren për “vrasësit me makinë”, të cilët ecin pa frikë, të mbrojtur nga lidhje, nga arroganca dhe nga një sistem që ka dështuar të vendosë rend. Shoferë të dehur apo të droguar, shpesh me makina luksoze, përplasin njerëz e fëmijë dhe dalin të nesërmen të lirë. Ndërkohë që këto ngjarje përsëriten, Ministria e Brendshme dhe Policia e Shtetit gjejnë kohë e energji për të ndaluar… skuterat elektrikë.
Aksioni i nisur nga ministrja Albana Koçiu për ndalimin e skuterave u bë brenda ditës, pa asnjë dokument zyrtar, vetëm pas një postimi në Facebook. Policia reagoi menjëherë për ta zbatuar këtë “urdhër verbal”, sikur qytetarët me skuter ishin rreziku më i madh në rrugë. Ndërkohë që të dehurit në timon, me makina që fluturojnë mbi vijat e bardha, vazhdojnë të jenë jashtë kontrollit.
Drejtori i Përgjithshëm i Policisë, Ilir Proda, do të duhej të merrej me këta. Të kërkonte aksione kundër atyre që drejtojnë mjetet nën efektin e alkoolit apo drogës, të kërkonte ndëshkime shembullore për ata që marrin jetë njerëzish në rrugë. Por për momentin, duket më e lehtë të ndalosh një qytetar me një skuter sesa një “Porsche” që ecën me 180 km/orë në qytet.
Në një vend ku jeta e njeriut matet me pagesën e një gjobe, ku policia ndalet tek i dobëti dhe mbyll sytë për të fortin, nuk ka rend, nuk ka drejtësi. Nëse ministrja Koçiu kërkon të bëjë ndryshim, le të fillojë nga aty ku ndodhin vrasjet e vërteta — jo tek ata që ecin me skuter për të shkuar në punë.
