Një aksident tragjik ndodhi ditën e djeshme në një nga galeritë e zonës D në Bulqizë, ku humbi jetën minatori 38-vjeçar K. D., si pasojë e shembjes së një masivi shkëmbor brenda nëntokës.
Policia e Bulqizës ka vënë në pranga dy punonjës të stafit teknik: brigadierin G. K., 47 vjeç, dhe teknikun B. C., 62 vjeç. Ndërkohë, është proceduar penalisht në gjendje të lirë drejtuesi teknik i punimeve, R. P., 67 vjeç.
Nga hetimet paraprake rezulton se të arrestuarit dhe të proceduarit nuk kishin marrë masat e nevojshme të sigurisë teknike në vendin e punës, çka ka sjellë pasojat fatale për minatorin.
Ngjarja po hetohet nga autoritetet për veprën penale “Shkelja e rregullave të mbrojtjes në punë”, me pasojë vdekjen.
Njoftimi i policisë:
Bulqizë
Nuk morën masa për sigurimin e kushteve të mbrojtjes në punë, në subjektin minerar ku humbi jetën dje shtetasi K. D., arrestohen 2 punonjës të stafit teknik dhe procedohet penalisht, në gjendje të lirë, drejtuesi teknik i subjektit.
Në vijim të veprimeve hetimore të kryera me qëllim zbardhjen e rrethanave dhe përgjegjësisë në lidhje me ngjarjen e djeshme, të ndodhur në një subjekt minerar në zonën D, Bulqizë, ku humbi jetën shtetasi K. D., 38 vjeç, dyshohet se, si pasojë e shembjes së një masivi shkëmbor gjatë punës në galeri, shërbimet e Komisariatit të Policisë Bulqizë arrestuan në flagrancë shtetasit:
G. K., 47 vjeç, me detyrë brigadier;
B. C., 62 vjeç, me detyrë teknik, të dy banues në Bulqizë.
Gjithashtu, nisi procedimi penal në gjendje të lirë për shtetasin R. P., 67 vjeç, banues në Peshkopi, me detyrë drejtues teknik në subjektin minerar.
Nga hetimet e deritanishme ka rezultuar se këta shtetas, me veprimet ose mosveprimet e tyre, nuk kanë marrë masat e duhura për garantimin e kushteve të sigurimit teknik të punës në subjektin minerar.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprën penale “Shkelja e rregullave të mbrojtjes në punë”, me pasojë vdekjen.
