Gjykata e Posaçme Kundër Korrupsionit dhe Krimit të Organizuar (GJKKO) ka dhënë vendimin për ish-Audituesin e Kontrollit të Lartë të Shtetit (KLSH), Bardhi Koçi, dhe bashkëpunëtoren e tij, Pranvera Meshi, për veprën penale “Ushtrimi i ndikimit të paligjshëm ndaj personave që ushtrojnë funksione publike”.
Koçit dënimi i është konvertuar me shërbim prove prej 3 muajsh e 4 ditësh. Ndërsa Pranvera Meshi, e cila është dënuar me 8 muaj burg, përmes gjykimit të shkurtuar është lënë e lirë.
Bardhi Koçi, me profesion avokat, i cili në kohën e kryerjes së veprave penale ishte i punësuar si Auditues në Kontrollin e Lartë të Shtetit, ka kërkuar nga Pranvera Meshi, shumën prej 1500 eurosh dhe ka marrë prej saj paraprakisht 1000 një mijë euro, me qëllim ushtrimin e ndikimit në vendimmarrjen e gjyqtarit, i cili po shqyrtonte çështjen në ngarkim të saj.
Gjithashtu, Koçi ka kërkuar 1,300 euro nga një tjetër shtetas, me qëllim përshpejtimin e seancës gjyqësore për caktimin e masës së sigurimit personal ndaj shtetases N.M., e arrestuar për veprën penale “Drejtimi i automjeteve në mënyrë të parregullt”.
Ai rezulton gjithashtu i përfshirë në marrjen e përfitimeve të paligjshme nga shtetasi R.G., për të ushtruar ndikim tek ekspertët e Institutit të Policisë Shkencore. Ky ndikim lidhej me nxjerrjen e aktit të ekspertimit kimik për një sasi lënde narkotike të sekuestruar shtetasit B.G., i dyshuar po ashtu për veprën penale “Drejtimi i automjeteve në mënyrë të parregullt”.
