Një 47-vjeçar me origjinë shqiptare është vënë sot në pranga nga autoritetet italiane, pasi u kap duke transportuar një sasi të konsiderueshme lënde narkotike. Sipas raportimeve të mediave vendase, shqiptari po udhëtonte me makinën e tij kur u ndalua nga patrullat e policisë në një pikë kontrolli pranë kabinës së pagesës së autostradës në zonën San Gregorio di Catania. Gjatë kontrollit të ushtruar në automjet, uniformat blu zbuluan dhe sekuestruan mbi 27 kilogramë kokainë, një sasi e madhe që dyshohet të ishte destinuar për tregun e paligjshëm të drogës.
Pas sekuestrimit të lëndës narkotike dhe procedurave të para, 47-vjeçari u arrestua dhe u shoqërua menjëherë në komisariat. Autoritetet italiane kanë vendosur ta lënë atë në burg, ku do të vijojë të mbahet në pritje të proceseve të tjera ligjore që do të zhvillohen ndaj tij.
Hetimet paraprake janë në vazhdim për të zbuluar nëse shqiptari ishte pjesë e një rrjeti më të gjerë trafikimi dhe cilat kanë qenë destinacionet përfundimtare të drogës së kapur.
