Mbi 103 mijë veshje të dyshuara si të falsifikuara janë sekuestruar në portin e Durrësit, në një operacion të zhvilluar nga Drejtoria e Antikontrabandës në bashkëpunim me degën doganore Durrës.
Sipas njoftimit zyrtar, autoritetet goditën një rast të cënimit të të drejtave të pronësisë intelektuale, duke bllokuar një sasi të konsiderueshme mallrash që mbanin marka të njohura ndërkombëtare si Adidas, Nike, Gucci, Dior, Hugo Boss dhe Calvin Klein.
Mes produkteve të bllokuara kishte gjithashtu bluza sportive me logo të ekipeve të njohura europiane.
Autoritetet doganore kanë bërë bllokimin e menjëhershëm të mallit dhe kanë nisur procedurat përkatëse ligjore ndaj subjekteve përgjegjëse.
