Gjykata e Shkallës së Parë të Juridiksionit të Përgjithshëm në Korçë ka vendosur sot masën e sigurisë “Arrest në burg” ndaj shtetasit Ilirjan Selmani, 31 vjeç, banues në Pogradec, i cili akuzohet për kryerjen e veprës penale “Vrasja për shkak të marrëdhënieve familjare”, parashikuar nga neni 79/c i Kodit Penal.
Sipas organit të akuzës, Ilirjan Selmani dyshohet se ka vrarë me thikë 52-vjeçaren Kozeta Teço, me të cilën kishte një lidhje intime prej afro tre vitesh, dhe më pas i ka vënë zjarrin banesës së saj në Pogradec me qëllim fshehjen e gjurmëve të krimit. Ngjarja ndodhi mëngjesin e datës 28 korrik 2025 dhe fillimisht u raportua si një aksident me pasojë vdekjen nga asfiksia për shkak të zjarrit.
Megjithatë, pas kqyrjes së trupit të viktimës nga ekspertët mjekoligjorë u konstatuan shenja të dukshme dëmtimi të shkaktuara me mjet prerës, çka çoi në rihapjen e hetimeve dhe ndërtimin e pistës së një vrasjeje të qëllimshme. Policia më pas identifikoi dhe arrestoi autorin e dyshuar, i cili u kap disa orë pas ngjarjes në banesën e tij.
Në seancën gjyqësore të zhvilluar ditën e sotme në Korçë, mbrojtësi ligjor i Selmanit, avokati Denis Mekolli, deklaroi se klienti i tij nuk ka pranuar në asnjë moment autorësinë e krimit, as gjatë marrjes në pyetje nga policia dhe as përpara gjykatës. Sipas tij, 31-vjeçari ka shprehur keqardhje për vdekjen e viktimës dhe ka pohuar se marrëdhënia me të ishte vetëm në nivel njohjeje, duke mohuar bashkëjetesën.
“Klienti im është një djalë i qetë, i ardhur nga një familje e mirë dhe nuk ka kapacitetin për të kryer një krim të tillë. Ai nuk e ka pranuar kurrë autorësinë e veprës penale”, u shpreh avokati Mekolli. Ai shtoi se nuk ka prova të mjaftueshme që të mbështesin akuzën e ngritur dhe se mbrojtja do të kërkojë sqarimin e të gjitha rrethanave të ngjarjes.
Nga ana tjetër, Prokuroria ka dorëzuar pranë gjykatës një sërë provash, përfshirë pamje filmike të siguruara nga kamerat e sigurisë në zonë, si dhe dëshmi që sipas hetuesve vërtetojnë praninë e të dyshuarit në vendngjarje dhe lidhjen e tij me viktimën.
Ndërkohë, në dëshminë e dhënë më herët në polici, Selmani ka pohuar se lidhja me Teçon kishte kaluar një periudhë të vështirë. Ai ka deklaruar se viktima kishte probleme të shëndetit mendor dhe se shpesh ushtronte dhunë ndaj tij. “E doja, nuk më bënte përshtypje mosha. Ajo shpesh dehej dhe më godiste, por e duroja sepse e doja. Pastaj nuk durova dot më”, ka thënë ai sipas burimeve nga hetimi.
Ngjarja ka shkaktuar reagim të gjerë në opinionin publik dhe është konsideruar një prej krimeve më të rënda të viteve të fundit në zonën e Pogradecit.
Në një dëshmi të dhënë jashtë kamerave, nëna e të dyshuarit, znj. Sanie Selmani, ka mohuar përfshirjen e të birit në ngjarje. Ajo është shprehur se djali i saj e ndihmonte Kozetën për shkak të gjendjes së saj fizike dhe se nuk ka qenë dakord me marrëdhënien mes tyre, por nuk i kishte kërkuar që të ndaheshin. “Ai nuk e ka bërë këtë krim. Nuk ka prova. Djali im është i sëmurë nga zemra dhe nuk është ashtu siç po e paraqesin mediat”, është shprehur ajo.
Prokuroria dhe policia vijojnë hetimet për zbardhjen e plotë të rrethanave të kësaj ngjarjeje të rëndë.
Masa e sigurisë “Arrest në burg” ndaj Ilirjan Selmanit do të jetë në fuqi deri në përfundimin e hetimeve dhe dërgimin e çështjes për gjykim të plotë penal.
Në pritje të të dhënave të reja, lajmi do të përditësohet.
