Prokuroria pranë Gjykatës së Shkallës së Parë të Juridiksionit të Përgjithshëm Fier ka nisur hetimet për vrasjen e rëndë të ndodhur më 23 korrik, në fshatin Frashër të Fierit. Ngjarja u regjistrua rreth orës 21:16, kur në Sallën Operative Fier u mor një telefonatë për një person të dëmtuar në banesën e tij.
Kur ambulanca mbërriti në vendngjarje, gjeti 56-vjeçarin Anesti Rama të pajetë, në sallonin e shtëpisë. Ai ishte i veshur me kostum dhe këmishë. Hetimet paraprake zbuluan dëmtime të dukshme në fytyrë dhe në pjesën ballore të kokës së viktimës.
Fillimisht, familjarët pretenduan se Rama ishte rrëzuar në tualet. Sipas dëshmisë së vajzës së tij, Emanilda Rama, dhe bashkëshortes, Valbona Rama, ato e kishin gjetur pa shenja jete në tualet, e kishin pastruar, veshur për ceremoninë mortore dhe kishin pastruar vendin e ngjarjes.
Por pas hetimeve të para dhe përdorimit të metodave të avancuara hetimore, Prokuroria përjashtoi versionin e familjarëve dhe arrestoi në flagrancë:
Emanilda Rama, e dyshuar për "Vrasje për shkak të marrëdhënieve familjare", kryer në bashkëpunim;
Valbona Rama, e akuzuar për "Veprime që pengojnë zbulimin e së vërtetës";
Çlirim Dogani, i ndaluar si bashkëpunëtor i dyshuar në vrasje, pasi dyshohet se ka pasur një marrëdhënie intime me vajzën e viktimës.
Prokuroria kërkoi dhe mori miratimin e gjykatës për masën e sigurisë “arrest në burg” për të tre personat.
Në një deklaratë zyrtare, Prokuroria e Fierit tha se hetimet do të vijojnë me përkushtim për të zbardhur plotësisht ngjarjen dhe për të vendosur përpara drejtësisë çdo person të përfshirë në këtë krim të rëndë.
