Prokuroria Themelore e Gjilanit ka dhënë detaje të reja që lidhen me të kaluarën e Mefial Shkodrës dhe dy djemtë të tij, të cilët akuzohen si autorë të masakrës me 3 të vrarë dhe një të plagosur. Për Mefail Shkodrën prokuroria deklaron se nga viti 2000 janë pranuar gjithsej 5 kallëzime penale.
“Duke marrë shkas nga raportimet lidhur me të kaluarën penale të dyshuarit Mefail Shkodra, njoftojmë opinionin publik se për atë në Prokurorinë Themelore të Gjilanit nga Policia e Kosovës që nga viti 2000 janë pranuar gjithsejt 5 raste penale, në 4 raste janë ngritur aktakuza sipas lëndëve PP.II.300/2005, PP.II.394/2011, PP.II.1091/2014, PP.I.154/17 dhe në lëndën PP.II.913/2023 është zgjidhur në procedurë të ndërmjetësimit”, njofton prokuroria, sipas medias në Kosovë.
Lidhur me dy djemtë e tij, Edonis Shkodra dhe Engjëll Shkodra, prokuroria thotë se nuk janë hetuar më herët për ndonjë ngjarje kriminale.
Mefail Shkodra akuzohet se ekzekutoi 3 persona, ndërsa një i 4 mbeti i plagosur rëndë. Viktima mbetën Abedin Hoxha, Selami Hasani dhe Edmond Hasani, babë e bir, argjendarë të njohur në Gjilan dhe Bujar Hoxha. Masakra dyshohet se ka si motiv konfliktet që lidhen me fajdet.
