Një ngjarje e rëndë ka tronditur sot ishullin e Kretës në Greqi, ku një përplasje e armatosur mes dy familjeve në fshatin Vorizia të Heraklionit ka përfunduar në tragjedi. Sipas mediave greke, të paktën tre persona kanë humbur jetën dhe rreth 15 të tjerë janë plagosur, disa prej tyre në gjendje kritike.
Ngjarja, që po përshkruhet si “një fshat në gjendje lufte”, dyshohet të jetë rezultat i një hakmarrjeje të vazhdueshme midis dy familjeve që ndodhen në konflikt prej më shumë se një viti. Raportimet nga mediat vendase tregojnë se janë qëlluar mbi 2,000 plumba, ndërsa në terren janë angazhuar njësi të shumta policore dhe forca speciale për të vënë nën kontroll situatën.
Në mesin e viktimave janë një grua 50-vjeçare, një burrë i ri dhe një person tjetër, ndërsa të plagosurit janë transportuar në spitalet e Heraklionit, si dhe në qendrat shëndetësore të Moirës dhe Agia Varvarës. Për shkak të numrit të madh të të plagosurve, banorët e zonës kanë përdorur edhe automjete bujqësore për transportin e tyre.
Sipas burimeve paraprake, konflikti ka origjinën në një incident të ndodhur një vit më parë, kur një mjet shpërthyes i improvizuar u vendos në një ndërtesë në ndërtim, duke shkaktuar dëme materiale por pa viktima. Ngjarja e sotme besohet të jetë hakmarrje për atë sulm.
Policia greke ka konfirmuar se disa banesa dhe automjete janë djegur gjatë përplasjes, ndërsa plumbat e kallashnikovit janë përhapur në të gjithë fshatin. Në mesin e të plagosurve raportohet se ka edhe zyrtarë policie që ndodheshin në vendngjarje për të ndaluar përshkallëzimin e dhunës.
