Masakër në Gjilan të Kosovës. Tre persona të vrarë dhe një i plagosur është bilanci i deritanishëm i ngjarjes. Autori i dyshuar është shpallur në kërkim nga policia. Krimi tronditës ndodhi rreth orës 12:30 në një nga lokalet e Gjilanit, sipas konfirmimit që zëdhënësi i Policisë për rajonin e Gjilanit, Ismet Hashani, dha për Express.
“Ju njoftoj se sot, 10.08.2025, rreth orës 12:32 dyshohet se ka ndodhur një rast vrasjeje dhe plagosjeje me armë zjarri në Gjilan, rr. ‘Ibrahim Rugova’. Në këtë rast mjeku kujdestar e ka konstatuar vdekjen e dy personave dhe dyshohet se edhe dy persona të tjerë janë plagosur dhe u është ofruar ndihmë në qendrën emergjente këtu në Gjilan. I dyshuari për rastin është personi mashkull, shtetas i Kosovës, i njohur për policinë, i cili për momentin është në arrati. Në vendin e ngjarjes kanë dalë njësitet relevante dhe prokurori i shtetit. Policia e Kosovës, njësiti i hetimeve rajonale, në bashkëpunim me prokurorin e shtetit, po i hetojnë rrethanat e këtij rasti të rëndë”, tha Hashani.
Fillimisht, sipas raportimeve, në vendin e ngjarjes mbetën të vrarë dy persona, babë e bir. Një i tretë ndërroi jetë më vonë në spital, ndërsa personi i katërt ndodhet nën kujdesin e mjekëve.
Autori i dyshuar është identifikuar si Mefail Shkodra. Ai është shpallur në kërkim. Policia e Gjilanit ka kërkuar ndihmën e qytetarëve për ta kapur atë, duke publikuar fotografinë e tij me autorizim të Prokurorisë.
“Policia e Kosovës, Drejtoria Rajonale e Policisë në Gjilan, bazuar në autorizimin e Prokurorisë Themelore në Gjilan, me qëllim të lokalizimit dhe arrestimit të të dyshuarit, lëshon këtë kërkesë për bashkëpunim me qytetarë dhe mediat”, thuhet në njoftim.
“Policia e Kosovës, Drejtoria Rajonale Gjilan kërkon nga qytetarët dhe mediat që kushdo që ka informacion për vendndodhjen e personit në foton e bashkëngjitur, të lajmërojë Policinë e Kosovës në stacionin më të afërt policor apo përmes aplikacionit digjital ‘Lajmëro Policinë’, E-mail: [email protected] dhe numrat kujdestarë: 192; 03850807001. Të dhënat e juaja do të ruhen në konfidencialitet të plotë”, theksohet më tej.
Sipas hetimeve paraprake, dyshohet se krimi ka ndodhur për shkak të konflikteve për fajdet.
