Një person përfundoi në pranga, ndërsa një tjetër u shpall në kërkim, në kuadër të një aksioni policor në Lezhë, pasi kishin përshtatur një vilë trekatëshe në kazino.
Sipas policisë, u arrestua Bledar Arapi, përgjegjës i kazinosë, ndërsa Elger Uka 24 vjeç, që kishte marrë me qira godinën, u shpall në kërkim.
15 persona të tjerë që u gjetën brenda kazinosë po hetohen në gjendje të lirë.
“Gjatë kontrollit në një banesë trekatëshe, të marrë me qira nga shtetasi Elger Uka, 24 vjeç, dhe të përshtatur katet e dyta dhe të treta për ushtrimin e lojërave të fatit dhe përdorim droge, shërbimet e Policisë gjetën dhe sekuestruan, në cilësinë e provës materiale, 15 makineta për lojëra fati, një tavolinë pokeri, çipsa, letra bixhozi, disa doza kokaine, 725 000 lekë të rinj, si dhe euro e dollarë”, njoftoi policia. Gjatë aksionit u sekuestruar miliona lekë, euro dhe dollarë, kokainë, makineta, tavolinë pokeri, letra bixhozi etj.
