Faqja e VNA u përball mbrëmë me një sulm të koordinuar kibernetik të llojit DDoS (Distributed Denial of Service) nga servera jashtë Shqipërisë. Sipas ekipit teknik të Mediadesk që menaxhon dhe kujdeset për sigurinë e faqes, u regjistruan rreth 5 milionë kërkesa brenda pak sekondash.
Pavarësisht përmasave të jashtëzakonshme të këtij sulmi, i cili kishte për qëllim bllokimin total të informimit, faqja nuk pati asnjë sekondë ndërprerje. Ky stabilitet u arrit falë ndërhyrjes së menjëhershme të teknikëve tanë dhe partneritetit me Cloudflare, një nga gjigantët botërorë të sigurisë kibernetike, që mundësoi zmbrapsjen e sulmit në kohë reale.
Ky nuk është një rast i izoluar. Mediat kritike shpesh vihen në shënjestër të sulmeve teknike si një formë presioni për të penguar publikimin e të vërtetave që ‘shqetësojnë’ qarqe të caktuara.
Për momentin mbetet e pamundur të identifikohet prejardhja e saktë e këtij agresioni digjital. Megjithatë, ne mbetemi të palëkundur në misionin tonë për të thënë atë që shpesh nuk thuhet me zë të lartë në mediat tradicionale.
VNA do të vazhdojë të jetë online, e aksesueshme dhe profesionale.
