Një ngjarje e rëndë tronditi mbrëmjen e së premtes fshatin Mollaj të Korçës, ku një konflikt për motive të dobëta përfundoi me plagosjen e rëndë të një 28-vjeçari. Sipas burimeve zyrtare, i riu u godit me thikë nga një 41-vjeçar, i cili u arrestua pak pas ngjarjes. Autori, që mbeti gjithashtu i dëmtuar gjatë përplasjes, ndodhet në spital jashtë rrezikut për jetën.
Hetimet e Policisë së Korçës, të zhvilluara nën drejtimin e Prokurorisë, zbardhën dinamikën e plotë të konfliktit. Pamjet filmike të siguruara nga vendngjarja treguan se katër shtetas të tjerë ndërhynë menjëherë pas plagosjes për të ndihmuar 28-vjeçarin, por në bashkëpunim me njëri-tjetrin sulmuan autorin duke e goditur me grushta dhe duke i shkaktuar plagë në kokë e trup.
Në pranga ranë: I. D., 45 vjeç, Th. P., 47 vjeç, Dh. K., 47 vjeç dhe B. S., 33 vjeç, të gjithë banues në fshatin Mollaj, të dyshuar për veprën penale “Plagosje e rëndë me dashje” në bashkëpunim. Ndërkohë, 41-vjeçari Q. akuzohet për “Vrasje me dashje” të mbetur në tentativë, “Dëmtime të tjera me dashje” dhe “Prodhimi, mbajtja, blerja apo shitja pa leje e armëve të ftohta”.
Si prova materiale u sekuestruan mjeti prerës (thikë), një aparat celular dhe pamjet filmike. Materialet procedurale tashmë i janë dorëzuar Prokurorisë së Korçës për vijimin e hetimeve dhe përcaktimin e përgjegjësive ligjore.
