Që në orën 6 të mëngjesit të ditës së sotme, forca të Ushtrisë të Emergjencave Civile dhe të Policisë së Dibrës, kanë nisur kërkimet për gjetjen e trupit të 30-vjeçarit Jurgen Karaj, i cili dyshohet se e mori rrjedha e përroin në fshatit Dars të Klosit.
Kërkimet janë në ditën e dytë dhe operacioni për gjetjen e trupit të tij është përqendruar pranë Urës së Halilit në Fullqet. Në këtë operacion janë angazhuar familjarë të personit që deri më tani rezulton i zhdukur si dhe vullnetarë që janë kryesisht banorë të zonës. Për shkak të kushteve të vështira të motit kërkimet paraqesin vështirësi, megjithatë do të vijojnë derisa të gjendet trup.
30-vjeçari ndodhej si pasagjer në një automjet që drejtohej nga 24-vjeçar, Andi Losha, kur ky i fundit humbi kontrollin dhe makina përfundoi në përrua. 24-vjeçari arriti që të dalë nga makina dhe të mbijetojë, ndërsa 30-vjeçari dyshohet se është marrë nga rrjedha e ujit. Losha është arrestuar, pasi dyshohet se e drejtonte makinën në gjendje të dehur dhe nuk i dha ndihmë pasagjerit, ndërsa nuk njoftoi policinë, por u largua nga vendngjarja.
