Gazetarja Klodiana Lala, gjatë një prononcimi në emisionin “Të Paekspozuarit” në MCN TV, ka zbuluar detaje për kapjen në territorin shqiptar të disa pajisjeve të sofistikuara të përgjimit, të futura nga tre shtetas italianë, dy prej të cilëve zyrtarë të Guardia di Finanza.
Sipas Lalës, tre shtetasit italianë janë lejuar të largohen drejt Italisë, ndërsa pajisjet janë mbajtur në Shqipëri dhe janë sekuestruar nga autoritetet. Prokuroria ka nisur hetimet, por deri tani nuk ka asnjë reagim zyrtar dhe ngjarja, sipas gazetares, është mbajtur e fshehtë.
“Bëhet fjalë për një skandal të madh që po konsumohet në territorin e Shqipërisë. Këto janë pajisje të sofistikuara përgjimi dhe ndodhen në ambientet e Prokurorisë së Durrësit. Kam marrë dijeni për rastin të shtunën. Më është konfirmuar se tre persona kishin udhëtuar me tragetin e linjës Bari–Durrës dhe kishin mbërritur të premten në Portin e Durrësit. Ata kanë qëndruar në Shqipëri rreth 12-13 orë dhe dyshohet se kanë kryer përgjime të paligjshme, të paautorizuara, pa pasur një skuadër të përbashkët”, tha Lala.
Sipas saj, tre shtetasit janë ndaluar në momentin kur do të largoheshin me tragetin Durrës–Ankona. Ata janë prezantuar si punonjës të Guardia di Finanza, dhe verifikimet kanë treguar se dy prej tyre ishin vërtet të tillë. Nuk dihet nëse kishin autorizim nga eprorët, ndërsa personi i tretë rezulton të jetë një bashkëpunëtor i kontaktuar për përdorimin e pajisjeve.
Të tre janë marrë në pyetje dhe më pas janë lejuar të largohen drejt Italisë. Pajisjet janë bllokuar dhe pritet t’i nënshtrohen ekspertimit. Prokuroria ka caktuar një prokuror, ndërsa Policia e ka referuar çështjen për dy vepra penale: përgjim të paligjshëm dhe futje të mallrave kontrabandë.
Lala rikujtoi se Shqipëria ka pasur edhe më herët raste të dyshimta me pajisje përgjimi, përfshirë rastin e pajisjes IMSI Catcher dhe dy raste të tjera të bllokuara në hyrje ose dalje të vendit.
Sipas gazetares, rasti aktual është edhe më shqetësues për shkak se dy persona janë zyrtarë të Guardia di Finanza. “Ata lëvizin zakonisht për çështje që lidhen me krimin e organizuar ose politikanë që mund të kenë lidhje me të. Se kush është përgjuar, cili ka qenë itinerari dhe çfarë ka ndodhur me rezultatet e përgjimeve, kjo duhet të sqarohet nga Prokuroria. Heshtja e autoriteteve e bën skandalin edhe më të madh. Pse këta persona janë lejuar të largohen? Të paktën mund të ishin mbajtur me bllokim pasaporte deri në ekspertimin e pajisjeve”, tha ndër të tjera Lala.
