Gazetarja Klodiana Lala deklaroi në emisionin Opinion se dosja e hetuar nga SPAK për aferën e Agjencisë Kombëtare të Shoqërisë së Informacionit konsiderohet një nga skandalet më të mëdha të korrupsionit të dekadës së fundit.
Sipas saj, në këtë dosje përmendet edhe emri i Ergys Agasi, për të cilin dyshohet se ka përfituar pasuri që mund të kenë burim aktivitetin kriminal.
Lala tha se në materialet e hetimit përmenden edhe dyshime për ndërtime të paligjshme. Sipas saj, vilat e Agasit janë ngritur në sipërfaqe toke që dyshohet se janë kaluar në mënyrë të paligjshme, ndërsa disa parcela rezultojnë të jenë fshirë nga zërat e mëparshëm kadastralë. Ajo shtoi se në vitin 2024, sipas dosjes së SPAK, drejtuesja e kadastrës nuk ka zbatuar një vendim të Gjykatës së Lartë lidhur me këto prona.
Gazetarja deklaroi gjithashtu se është privatizuar një tokë shtetërore ku planifikohej ndërtimi i vilave ekskluzive, në një projekt që sipas saj lidhet me Agasin dhe Ervis Doçi, i njohur si “Visi i Pojës”, duke konfirmuar kështu, sipas saj, lidhjen mes tyre.
Për të njëjtën çështje, Lala tha se në dosje zbardhet se dhjetëra zyrtarë të kadastrës janë vënë në shërbim të Agasit, ndërsa ndërhyrjet e Inspektorati Kombëtar i Mbrojtjes së Territorit për ndalimin e punimeve nuk kanë ndodhur, duke bërë që ndërtimet të vazhdojnë.
Ajo theksoi se disa prona janë zhdukur nga regjistrat për t’u kaluar në favor të Agasit dhe se rasti i Gerond Meçe nuk është i vetmi që lidhet me presione apo pengmarrje në këtë dosje.
Në fund, Lala deklaroi se sipas informacioneve të saj, Ergys Agasi ndodhet aktualisht në Shqipëri dhe se janë zhvilluar disa aksione policore për arrestimin e tij pas largimit të personit të njohur si Proda.
