Klodian Braho është zgjedhur kreu i ri i Prokurorisë së Posaçme kundër Korrupsionit dhe Krimit të Organizuar (SPAK), duke marrë 7 vota pro. Ndërkoh, Adnan Xholi, mori 3 vota, Elvin Gokaj mori 1 votë, ndërsa Doloreza Musabelli nuk mori asnjë votë.
Braho, i emëruar prokuror në vitin 2007, ka qenë pjesë e SPAK që në krijimin e tij dhe aktualisht mban detyrën e shefit të seksionit kundër korrupsionit. Ai ka një rrugëtim të gjatë në sistemin e drejtësisë, duke u angazhuar në hetime të rëndësishme kundër korrupsionit.
Ndër dosjet më të njohura të Brahos është ajo e inceneratorit të Elbasanit, ku ka dhënë urdhër arresti për shumë persona, përfshirë Mirel Mërtirin, Stela Gugallja dhe Klodian Zoton, si dhe ka ndarë hetimin për ish-zv/kryeministrin Arben Ahmetaj. Ai ka hetuar gjithashtu dosjen 5D, duke dërguar në gjyq ish-drejtorët e Bashkisë së Tiranës, si dhe dosjen e njohur si “Toyota Auris”, e cila përfshin edhe figura të drejtësisë dhe është në proces hetimi për disa fraksione të tjera.
Gjithashtu, Braho është pjesë e grupit të prokurorëve që firmosën dosjen për ish-ministrin e Mbrojtjes, Fatmir Mediu, i akuzuar për “shpërdorim detyre” lidhur me rolin e tij në masakrën e Gërdecit, e cila ndodhet në proces gjyqësor.
