Kreu i ri i SPAK, Klodian Braho, ka folur për herë të parë pas marrjes zyrtarisht të detyrës, duke theksuar se fokusi i tij kryesor do të jetë funksionimi i brendshëm i institucionit dhe zbatimi i ligjit. Braho vlerësoi paraardhësit e tij, duke përmendur integritetin e Altin Dumanit dhe kontributin e Arben Krajës, ndërsa nënvizoi se BKH dhe hetimi financiar mbeten shtylla kyçe të SPAK.
Dua të vlerësoj paraardhësin nën detyrë, zotin Kraja, si dhe Dumanin për integritetin e tij. Në ushtimin e detyrës fokusi im do të mbetet funksionimi i brendshëm, funksionimi i ligjit. BKH dhe hetimi financiar janë shtylla të rëndësishme të SPAK.
Institucioni do të vijojë të komunikojë me mediat. Misioni i SPAK shkon përtej mandateve personale, besoj se jemi skuadër që punojmë përkrah në zbatim të Kushtetutës dhe ne interes të shqiptarëve.
Ai siguroi se institucioni do të vijojë komunikimin me mediat dhe theksoi se misioni i SPAK shkon përtej mandateve personale, në shërbim të Kushtetutës dhe interesit publik.
Nga ana e tij, Altin Dumani i uroi suksese pasardhësit të tij, duke e cilësuar drejtimin e SPAK si një nga kapitujt më sfidues të karrierës së tij. Dumani theksoi se pavarësisht presioneve dhe sfidave, SPAK sot është më i fortë, më i konsoliduar dhe më i besueshëm, falë përkushtimit të stafit të institucionit.
“Sot mbyllet një nga kapitujt më sfidues të karrierës sime. Privilegj i madh dhe përgjegjësi e jashtëzakonshme. Jemi përballur me sfida dhe presione, por PSAK është sot më i fortë, konsoliduar dhe më i besueshëm se më parë. Dua të falënderoj çdo punonjës për përkushtimin dhe sakrificat.”, -tha Dumani.
