Irena Gjoka po sfidon haptas reformën në drejtësi. Institucionet janë vënë në funksion të mbajtjes së saj në detyrë, duke ia zgjatur sa më shumë mandatin si gjyqtare e Posaçme, ndonëse rezultoi e dënuar në Greqi për përdorim vize të falsifikuar. Këtë dënim ajo nuk e ka deklaruar, sikurse e detyron ligji për dekriminalizimin.
Pas gati dy vitesh mbajtjeje të çështjes pa vendimmarrje, Prokuroria e Përgjithshme deklaroi zyrtarisht se gjyqtarja ishte e dënuar dhe ia përcolli çështjen Këshillit të Lartë Gjyqësor.
Këtë të premte, në mungesë të plotë transparence, KLGJ e futi çështjen për diskutim në rendin e ditës pa asnjë njoftim paraprak, ndonëse ligji e parashikon një procedurë të tillë.
Këshilli i Lartë Gjyqësor vendosi të mos shqyrtojë relacionin e Këshillit të Karrierës mbi verifikimin e mandatit të gjyqtares së posaçme. Ndërsa Ridvan Hado një nga anëtarët e KLGJ-së propozoi që çështja t’i përcillej Inspektorit të Lartë të Drejtësisë, Artur Metani.
Por ky propozim nuk u votua në mbledhjen e KLGJ, por zyrtarisht ky institucion deklaroi se do ta vijojë procedurën.
Sipas verifikimit të Prokurorisë së Përgjithshme, Irena Gjoka rezulton e dënuar me 3 muaj burg dhe 1500 euro gjobë për përdorim vize të falsifikuar. Ky dënim nuk është deklaruar në formularin e dekriminalizimit.
Për këtë rast po heton edhe SPAK.
