Më kërkesë të avokatit të Ilir Metës, gjyqtari i Posaçëm Erion Bani shpalli moskompetencë dhe ia kaloi çështjen kolegut të tij Erjon Çela, që është gjyqtar i hetimeve paraprake.
Në seancë nuk ishin të pranishëm prokurorët e çështjes Arben Kraja e Sotir Kllapi, por prokurori i gatshëm Alfred Shehu. Ndërsa mungonte ish-presidenti Ilir Meta.
Ky i fundit vuri në lëvizje GJKKO me kërkesë për zëvendësim mase sigurie. Tashmë me këtë vendim të Banit, seanca pritet të zhvillohet nga gjyqtari Çela brenda afatit ligjor.
Ish-Presidenti Ilir Meta nuk ishte i pranishëm në seancë, por u përfaqësua nga avokatët Kujtim Cakrani dhe Dylejman Karaj. Kërkesa për zëvendësimin e masës së sigurisë u paraqit më 6 gusht, ndërsa avokatët argumentuan se nuk ekziston më rreziku që Meta të prishë provat, pasi hetimi është mbyllur dhe dosja është kaluar në gjykim.
Procesi për zëvendësimin e masës së sigurisë do të vazhdojë tani nga gjyqtari kompetent për këtë çështje.
