Policia e Shkodrës ka arrestuar një 37-vjeçar, i cili ka kërcënuar me armë zjarri fqinjin e tij pas një konflikti për motive të dobëta.
Sipas njoftimit zyrtar, në ngjarje është përfshirë edhe 22-vjeçari A.G., i cili, sapo ka parë policinë, ka marrë armën e zjarrit dhe është larguar me vrap. Ai është shpallur në kërkim.
Pas ndërhyrjes së menjëhershme të forcave të Policisë dhe të njësisë “Shqiponja”, është arrestuar në flagrancë shtetasi M.B., 37 vjeç, banues në Shkodër. Nga hetimet paraprake dyshohet se dy të rinjtë kanë kanosur me pistoletë fqinjin e tyre, shtetasin E.K.
Policia po punon për kapjen e 22-vjeçarit dhe gjetjen e armës së përdorur në ngjarje. Materialet janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.
