Policia e Krujës ka parandaluar një ngjarje të mundshme kriminale brenda familjes. Sipas njoftimit zyrtar, shërbimet e Komisariatit të Policisë Krujë janë njoftuar se një shtetas po kanoste me armë zjarri të tipit kallashnikov familjarët e tij, në banesën e tyre në fshatin Qerekë.
Menjëherë pas marrjes së informacionit, shërbimet policore kanë organizuar veprimet dhe kanë mbërritur në vendngjarje, duke bërë të mundur arrestimin në flagrancë të autorit të dyshuar, shtetasit E. V., 41 vjeç. Gjatë kontrollit të ushtruar në banesën e tij, Policia ka gjetur dhe sekuestruar një armë zjarri kallashnikov, me të cilën dyshohet se ka kërcënuar familjarët, si dhe dy armë gjahu.
Materialet procedurale i janë referuar Prokurorisë së Tiranës, për veprime të mëtejshme ligjore ndaj shtetasit të arrestuar.
